Стеллантис групп Итали дахь хоёр үйлдвэрийн үйлдвэрлэлээ түр зогсоов

Ройтерс агентлагийн хамгийн сүүлийн мэдээгээр Европын автомашин үйлдвэрлэгч Стеллантис групп Италийн өмнөд хэсэгт байрлах хоёр үйлдвэрийнхээ үйл ажиллагааг түр зогсооно гэж лхагва гарагт мэдэгдэв. Тодруулбал, Термолигийн хөдөлгүүрийн үйлдвэр арванхоёрдугаар сарын 16-наас 22-ны хооронд үйлдвэрлэлээ зогсоох бол Касиногийн автомашины үйлдвэр арваннэгдүгээр сарын 29-нд үйлдвэрлэлээ зогсоохоор төлөвлөжээ. Энэ хугацаанд ажилчдыг түр халах юм байна. Стеллантис группын Итали дахь брэндүүд нь Fiat болон Alfa Romeo юм. Тус компани Итали дахь үйл ажиллагаагаа тасралтгүй үргэлжлүүлэхийн тулд шаргуу ажиллаж байгаагаа мэдэгдсэн ч зарим нэг хатуу шийдвэр шаарддаг олон сорилттой тулгараад байгаа бөгөөд хялбар шийдэл байхгүй гэдгийг хүлээн зөвшөөрсөн. Стеллантис групп энэ жил Итали дахь үйлдвэрлэлээ олон удаа зогсоож байсан ч засгийн газар болон үйлдвэрчний эвлэлийнхэнтэй өмнөх хэлэлцээрийн үеэр тус компани Италийн үйлдвэрүүдийг хаахгүй, томоохон хэмжээний цомхотгол хийхгүй гэж амлаж байсныг дурдах нь зүйтэй.